36 katao timbog ng PDEA

Umaabot sa 36 na katao ang dinakip ng mga tauhan ng Philippine Drug Enforcement Agency (PDEA) na kinabibilangan ng dalawang nasa watchlist sa isinagawang magkakahiwalay na operasyon sa magkakahiwalay na lugar sa bansa.

Batay sa isinumiteng report ni PDEA Director General Undersecretary Anselmo Avenido Jr., ang dalawang nasa watchlist ay nakilalang sina Jabber Disommong Lawan na nakuhanan ng 100 gramo sa isinagawang buy-bust operation sa Lapu-Lapu City at Raul Duro Abenares na nakuhanan ng pitong sachet ng shabu sa kahabaan ng Kamagong St. Brgy. Sto. Niño, Pasay City.

Ayon sa report, ang mga nadakip ay pawang mga drug pusher at drug user na matagal nang minamanmanan ng mga awtoridad at nahulihan ng 187.0675 gramo ng shabu at 65.65 gramo ng pinatuyong dahon ng marijuana.

Isinagawa ang operasyon ng mga elemento ng PDEA at PNP sa Region 11-1; Region III-6; Region VIII-4; Region XI-5; Region XIII-3; CAR-5 at NCR noong Enero 28, 29 at 30.

Ang mga suspect ay sasampahan ng kasong paglabag sa RA 9165. (Ulat ni Doris Franche)