Anti-illegal drugs agent, nilikida

Pinagbabaril at napatay ang isang civilian agent ng Autonomous Region of Muslim Mindanao (ARMM) ng isang hindi pa nakikilalang lalaki, kahapon ng umaga sa Tondo, Manila.

Namatay noon din ang biktimang si Armando Magues, sinasabing civilian agent ng ARMM na nakatalaga sa Regional Anti-Illegal Drug Special Unit sanhi ng natamong mga tama ng bala ng baril sa katawan.

Ayon sa ulat, naganap ang pamamaril dakong alas-5:30 ng umaga sa harap ng Waray-Waray Restaurant sa Pier 12 Sulpicio Lines, North Harbor ng naturang lungsod.

Ayon sa salaysay ng saksing si Lydia Gultiano, 42, caretaker sa Waray-Waray Restaurant na bago naganap ang krimen ay nagpa-load pa sa kanya ang biktima saka bumalik malapit sa gate ng Pier 12 kasama ang isang babae.

Habang tumatawag ang biktima sa kanyang cellphone ay bigla itong nilapitan ng suspect at walang sabi-sabing pinagbabaril.

Matapos matiyak na patay na ang biktima ay mabilis na tumakas ang suspect, habang ang kasamang babae ng una ay mabilis ding umalis.

Inaalam pa ng mga awtoridad kung may kaugnayan sa droga ang pagpatay sa biktima at kung sino ang posibleng pumaslang dito. (Ulat ni Gemma Amargo)