Dalaga na-sandwich ng bus at van,patay

Isang dalaga ang nasawi, habang nasa kritikal namang kondisyon ang isa pa makaraang maipit sa dalawang nagbanggaang sasakyan, kahapon ng umaga sa Quezon City.

Namatay habang ginagamot sa East Avenue Medical Center ang biktimang si Eloisa Pulumbarit, 22, masscomm graduate sa UP Bagiuo at naninirahan sa San Agustin, Hagonoy, Bulacan, samantalang nagtamo naman ng mga pinsala sa ulo at katawan ang isa pang biktima na si Romina Tibacay.

Sa ulat ng pulisya, naganap ang insidente dakong alas-6 ng umaga sa kanto ng Timog at EDSA sa Quezon City.

Napag-alaman na magkasabay na tumatawid sina Pulumbarit at Tibacay nang bigla na lamang sumulpot ang rumaragasang Nova Transit na may plakang (TWL-653) na unang sumalpok sa likurang bahagi ng isang Isuzu van sa mismong stop light at aksidenteng naipit ang dalawa.

Dahil sa pagkaipit sa nagbanggaang sasakyan, napinsala ang kaliwang hita ni Tibacay, habang si Pulumbarit ay nawalan ng ulirat nang mabagok ang ulo at agad na isinugod sa nasabing ospital subalit binawian din ng buhay.

Samantala, nasa poder na ng Traffic Sector 4 ang driver ng bus na nakilalang si Den Regua at inihahanda na ang kaso laban dito. (Ulat ni Doris Franche)