Nakilala ang mga nadakip na sina SPO1 Ruben Cordova, PO1 Alejandro Mesa at PO1 Jamaron Sandao, pawang nakatalaga sa Intelligence and Investigation Division ng SAF sa Camp Bagong Diwa sa Bicutan, Taguig.
Nadakip din ang negosyante at umano’y treasure hunter na si Jose Rosete at bodyguard nitong si Ervin Buol.
Sa ulat ng pulisya, nadakip ang lima ng pinagsanib na puwersa ng WPD Station 9 at Special Weapons and Tactics Unit dakong alas-9 ng umaga sa loob ng Legaspi Towers sa Roxas Blvd., Malate matapos makatanggap ng impormasyon sa pagdadala ng baril ng nakasibilyan.
Nasamsam sa limang nadakip ang mga baril na M-16 rifle, kalibre .45, dalawang 9mm. pistol, iba’t ibang mga bala at magazine, isang Mitsubishi Adventure at isang K-9 unit o sniffing dog.
Sa inisyal na imbestigasyon, sinabi ni Rosete na kinuha umano niyang mga police escort ang tatlong pulis dahil marami siyang natatanggap na death threats.
Agad na sasampahan ng kasong administratibo ang mga pulis kung mapapatunayang hindi sumailalim sa proseso ang kanilang ‘escort service’ at kasong kriminal kung mapapatunayang sangkot sa anumang krimen o banta ng destabilisasyon. (Ulat ni Danilo Garcia)