4 na totoy timbog sa holdap

Mga bata pa lang ngunit nagawa nang mangholdap at handa na ring pumatay ng apat na totoy na nasa gulang 12-15 nang biktimahin nila ang isang mag-ina, kamakalawa ng gabi sa Tondo, Maynila.

Nakadetine ngayon sa WPD Station 2 ang mga suspect na itinago sa mga alyas na Jojo, Boboy, Totoy at Estong.

Sa ulat ng pulisya, nabatid na sakay ng isang pampasaherong jeep dakong alas-10 ng gabi ang mag-inang sina Nena Capilla at anak na si Fatima at binabaybay ang kahabaan ng Road 10 sa Tondo. Pagdating ng sasakyan sa isang kanto ay nagsisakayan ang apat na totoy.

Mabilis na tinutukan nito ang mag-ina at tinangay ang mga gamit ng mga ito. Nang pumalag si Gng. Capilla ay inambaan pa siya ng saksak ng isa sa mga suspect.

Mabilis na tumakas ang mga suspect subalit agad din silang nasukol sa loob ng Jose Reyes Memorial Medical center ngunit hindi na narekober ang mga gamit na kinuha sa kanilang biktima.

Naniniwala ang pulisya na may sindikatong humahawak sa mga suspect. (Ulat ni Danilo Garcia)