Cellphones ipagbabawal sa kolehiyo

Posibleng ipagbawal na ng Department of Justice (DOJ) sa mga estudyante sa kolehiyo ang paggamit ng cellphone upang mapigilan ang paglaganap ng illegal betting sa pamamagitan ng text messages.

Ayon kay Acting Justice Secretary Merceditas Gutierrez, makikipag-ugnayan at tutulungan sila ng mga school authorities upang maipatupad ang pagbabawal ng cellphones sa mga estudyante sa kolehiyo, partikular na kung ang mga ito ay nasa loob ng kani-kanilang unibersidad.

Kasabay din nito’y nagtalaga ang NBI ng hotline (524-1141) upang dito makipag-ugnayan ang sinumang nais makipagtulungan sa mga awtoridad upang mahuli ang mga tumataya at nagpapataya sa nabanggit na illegal betting.

Gayunman, inamin ng NBI na mahihirapan sila na sugpuin ang nasabing illegal na sugal sa mga estudyante dahil na rin sa takot ang mga ito na makipag-ugnayan at ituro sa mga awtoridad kung sinu-sino ang sangkot dito.

Tinitingnan din ng DOJ at NBI kung positibo ang ulat na mayroong mga financier na mga opisyal ng Phil. Amusement and Gaming Corporation (PAGCOR) sa nasabing illegal betting. (Ulat ni Grace dela Cruz)