Richie D' Horsie timbog sa droga

Muli na namang nadakip ang dating komedyante at singer na si Richie D’ Horsie makaraang makuhanan ng limang plastic ng shabu matapos na salakayin ng pulisya ang isang bahay sa squatters’ area sa Project 4, Quezon City, kamakalawa ng gabi.

Si Richie na Ricardo Reyes sa tunay na buhay, 52, ng Alley 48 Project 6 ng nasabing lungsod ay nadakip bunsod ng muling pagkakasangkot sa ilegal na droga. Kasama nitong nadakip si Raymar Villamor, 24.

Batay sa pagsisiyasat ni PO1 Jerry Barrientos, ng CPD-Station 8 naganap ang pagsalakay dakong alas-7 ng gabi sa bahay ni Villamor.

Nabatid na nagtungo si Richie sa bahay ni Villamor upang kunin ang mga shabu, lingid sa kanyang kaalaman ay matagal na silang sinusubaybayan ng mga awtoridad.

Ito ay base sa ibinigay na impormasyon ng mga residente dito patungkol sa talamak na bentahan ng shabu sa lugar.

Inihahanda na ang kaso laban sa mga ito. (Ulat ni Doris Franche)