500 kabataan nasagip sa white slavery

Limandaang kabataang babae ang pinangakuan ng magandang trabaho sa ibang bansa ang nailigtas ng mga operatiba ng PNP-Criminal Investigation and Detection Group (PNP-CIDG) sa isinagawang raid sa isang talent-recruiting agency sa Makati City, kahapon ng hapon.

Ayon sa mga opisyal ng PNP-CIDG, dalawang medium-rise na gusali ang kanilang sinalakay na inookupa ng Marick Artist Placement Services na matatagpuan sa #2298 Marconi St., San Isidro, Makati City kung saan itinatago ang mga biktima.

Ang mga nailigtas na kabataan ay nagkakaedad mula 14 hanggang 17-anyos na pawang ni-recruit para magtrabaho bilang entertainers sa Japan subalit humahantong sa prostitution dens at night clubs sa iba’t ibang lugar sa Metro Manila.

Nabatid na ang nasabing mga kabataan ay ni-recruit pa ng isang kinilalang Jun Villar, administrator ng Marick na dinakip sa operasyon mula sa rehiyon ng Visayas at Mindanao.

Ang nasabing mga kabataan ay ni-recruit simula pa nitong huling bahagi ng nakalipas na taon para magtrabaho sa Japan bilang mga entertainers subalit pagdating sa Metro Manila ay sa mga prostitution den at night club ang mga ito humahantong. (Ulat ni Joy Cantos)