Pagkuha ng confidential agents ng NBI pinahihigpitan

Inatasan ng Department of Justice (DOJ) ang National Bureau of Investigation (NBI) na higpitan ang pagtanggap ng aplikasyon para mga nagnanais na maging confidential agent ng naturang ahensiya.

Ginawa ni Acting Justice Secretary Merceditas Gutierrez ang kautusan upang linawin na walang negosyante o oportunista na magiging confidential agent ng NBI para lamang protektahan ang kanilang personal na interes.

Iginiit pa ni Guiterrez na kakausapin niya si NBI director Reynaldo Wycoco na siguruhing malilinis ang ahensiya at walang makapapasok na maruming ahente.

Ito ay matapos na makatanggap ng ulat ang DOJ na mayroon ilang mayayamang negosyante ang nag-a-apply para maging confidential agent ng NBI para sa kanilang sariling kapakanan. Madalas pa rin umano na ito ay kanilang ipinagyayabang.

Sinasabing nagbabayad din umano ang mga negosyante sa mga opisyal sa NBI para lamang makakuha ng ID bilang confidential agent, madalas din umanong ito ang pinagkakakitaan ng mga opisyal sa NBI. (Ulat ni Gemma Amargo)