P 40 flag down rate sa taxi,ibinasura

Ibinasura ng Land Transportation Franchising Regulatory Board (LTFRB) ang petisyon ng Association of Taxi Operators in Metro Manila (ATOMM) para gawing P40 ang flag down rate ng mga nagbibiyaheng taxi sa Kalakhang Maynila.

Sinabi ni LTFRB board member Felix Racadio, tinanggihan nilang aksiyunan ang petisyon ng ATOMM na maitaas ang flag down rate dahil sa technicality.

Idinagdag pa nito na ginamit ng ATOMM sa kanilang aplikasyon ang mga dokumentong nai-file nila noong 2001 fare increase petition kaya’t hindi naaksiyunan ang naturang kahilingan.

"Dapat mag-file sila ng bagong application para sa increase ng flag down rate, hindi maaaring gamitin ang copy ng flag down rate petition na nagamit na nila, paso na yun eh," dagdag pa ni Racadio.

Nagsampa ng petisyon ang ATOMM dahil sa apektado rin naman sila ng naging pagtaas ng presyo ng gasolina, mga spare parts at maintenance fee.

Sa kasalukuyan ang flag down rate ng taxi ay P25.00. (Ulat ni Angie dela Cruz)