Kinaladkad ng tren,karpintero napugutan

Isang karpintero ang naputulan ng ulo makaraang makaladkad ng tren ng may 250 metro ang layo habang ito ay nagkukumpuni ng kanilang bahay, kahapon sa Makati City.

Nakilala ang nasawing biktima na si Reynaldo Pura, 49, ng 6370 PNR Road, Brgy. Pio del Pilar ng nabanggit na lungsod.

Kaagad namang tumakas ang operator ng tren na may body number na 405 na nakilalang si Audi Madrid ng Caloocan City.

Sa imbestigasyon ni SPO1 Mike Descalzo, ng Makati City Traffic Enforcement Unit, naganap ang insidente dakong alas-2 ng hapon sa harapan ng bahay ng biktima sa nabanggit na lugar.

Nabatid na nagkukumpuni ito ng kanyang bahay at hindi namalayan ang paparating na tren na nagbuhat sa Maynila.

Nahagip ang biktima at nakaladkad ito ng may 250 metro ang layo. Lasug-lasog at naputol ang ulo nito na naging sanhi ng agaran niyang kamatayan. (Ulat ni Lordeth Bonilla)