Estudyante tumalon sa Magallanes flyover,patay

Isang 23-anyos na Marine Transportation student ng Technological Institute of the Philippines (TIP) ang nasawi matapos itong magpatiwakal sa pamamagitan ng pagtalon mula sa isang flyover dahil hindi nito natupad ang pangarap ng kanyang mga magulang na maka-graduate noong nakaraang semester na naganap kahapon ng madaling-araw sa Makati City.

Binawian ng buhay habang nilalapatan ng lunas sa San Juan de Dios Hospital ang biktimang si Michael Cruzin, binata, nakatira sa #708 T. Anzures St., Lealtad, Manila.

Sa imbestigasyon ni SPO1 Lewelie Cristobal ng Homicide Section, Makati City Police, naganap ang insidente dakong ala-1:30 ng madaling-araw sa flyover ng Magallanes Interchange, Brgy. Magallanes, Makati City.

Nabatid na bumaba ang biktima mula sa sinasakyan nito at ilang saglit lamang ay tumalon mula sa flyover.

Nangingisay pa ito nang damputin ng ilang taong nakasaksi sa insidente kung saan kaagad itong isinugod sa nabanggit na pagamutan. Subalit habang nilalapatan ng lunas ang biktima ay binawian ito ng buhay.

Napag-alaman sa apat na pahinang suicide note na nakuha mula sa biktima na ilan lamang sa dahilan ng pagpapakamatay nito ay ang matinding depression sa buhay kung saan nabigo nitong matupad ang pangarap ng mga magulang na makapagtapos ng pag-aaral. Dapat aniya, noong nakaraang semester ay graduate na siya. Niloko lang niya ang mga magulang dahil hindi pala siya naka-graduate at nakasaad ito sa suicide note kasama ang paghingi ng tawad.(Ulat ni Lordeth Bonilla)