Frat war: 15 anyos patay

Isang 15-anyos na binatilyo ang nasawi, habang tatlo pa ang malubhang nasugatan makaraang tamaan ng bala ng sumpak buhat sa kalabang grupo ng fraternity, kahapon ng madaling-araw sa Tondo, Maynila.

Nakilala ang nasawi na nagtamo ng tama sa ulo na si Eddie "Boy" Tatoy, ng Moriones St., Tondo. Malubha naman ang kanyang kapatid na si Melchor, sugatan din sina Maro Ugbao, 16; at Romeo Rabago, 33.

Ayon sa ulat ng pulisya, naganap ang insidente dakong alas-3 ng madaling araw sa panulukan ng Road 10 at Moriones St. sa Tondo, Maynila.

Ayon sa mga saksi, nagkukuwentuhan sa naturang kanto ang magbabarkada nang dumating ang mga hindi nakikilalang kabataang lalaki na armado ng sumpak.

Walang sabi-sabing pinaputukan ng mga suspect ang mga biktima ngunit nagawa namang makaganti ng kanilang mga kasamahan nang pagbabatuhin nila ang mga kaaway na mabilis na nagsitakas.

Mabilis na isinugod sa pagamutan ang mga biktima ngunit tuluyang nasawi si Tatoy dakong alas-7 ng umaga kahapon. (Ulat ni Danilo Garcia)