Mag-asawang trader patay sa sunog,anak kritikal

Isang mag-asawang trader ang nasawi, habang nasa kritikal namang kondisyon ang 7-anyos nilang anak matapos masunog ang tinitirhan at pag-aari nilang dalawang palapag na gusali, kahapon ng madaling-araw sa Las Piñas City.

Nasawi noon din ang mga biktimang sina Celedonio dela Cruz, 37, at misis nitong si Marites, 30, ng #178 Angela Road, Barangay Talon Uno ng lungsod na ito.

Nagtamo naman ng 3rd degree burn at ginagamot sa Perpetual Medical Center ang anak nilang si Carlos, 7.

Samantala, tinatayang aabot sa multi-milyong pisong halaga ng ari-arian ang naabo sa naganap na sunog.

Base sa ulat ng Las Piñas City Fire Department, naganap ang trahedya dakong alas-4:56 ng madaling-araw mismong sa residential at commercial building ng mga biktima sa nabanggit na lugar.

Natutulog ang mag-anak ng biglang kumalat ang apoy. Hindi na nagawa pang makalabas ng mag-asawa makaraang makulong sila sa naglalagablab na apoy.

Tanging ang kanilang anak na si Carlos ang nasagip ng rescue team.

Hindi pa mabatid ng mga awtoridad kung ano ang pinagmulan ng naturang sunog. (Ulat ni Lordeth Bonilla)