Lider ng KFR group,2 galamay timbog

Bumagsak sa mga tauhan ng PNP Criminal Investigation and Detection Group (PNP-CIDG) ang isang lider ng kidnap-for-ransom gang at dalawa nitong tauhan sa isinagawang operasyon sa Taguig, Metro Manila.

Nakilala ang nasakoteng lider ng kidnap gang na si Felix Villaver, 45, na aktibong nag-ooperate sa Metro Manila at karatig lugar.

Nakilala naman ang mga nasakote nitong tauhan na sina Jerry Eagamano, 32 at Virgilio, na kapwa kamag-anak din ni Villaver.

Natunton ang mga suspect sa kanilang hideout sa 116 Libis St., Zone 5, Signal Village, Taguig dakong alas-7 ng umaga.

Hindi na nakalapag ang mga suspect matapos na mapalibutan ng arresting team ng PNP-CIDG ang lugar.

Base sa tala ng NAKTAF ang Villaver kidnap group ay sub-group ng Fajardo KFRG na pinamumunuan ng Jarado brothers na sina Harold at Rolando na kapwa may reward na tig-P1 milyon sa ulo.

Ang grupo ni Villaver ay siyang responsable sa pagdukot sa Fil-Chinese na si Mary Grace Ong noong Hunyo 18, 2001; sa plastic magnet na si Connie Yao Ong noong Oktubre 1, 2001; sa Japanese national na si Mark John Giga noong Setyembre 26, 2001. (Ulat ni Joy Cantos)