Life hatol sa 3 Chinese na pusher ng droga

Habambuhay na pagkabilanggo ang inihatol kahapon ng Manila Regional Trial Court (RTC) laban sa tatlong Chinese dahil sa pagbebenta ng droga apat na taon na ang nakakaraan sa Binondo.

Base sa 17 pahinang desisyon ng RTC branch 2, bukod sa habambuhay na pagkakulong pinagbabayad din ng korte ang bawat isang akusado na sina Hong Yen , alyas Agi/ Benjie Ong; Gun Lie Ang at Tsien Tsien Chua ng halagang P500,000.

Sinabi ni Assistant City Prosecutor Alexander Yap, naaresto ng mga operatiba ng NBI ang mga akusado noong Setyembre 6, 2001 sa isang food chain na matatagpuan sa Masangkay St., Binondo, Maynila dakong alas-12 ng madaling-araw. Ang tatlo ay sinasabing responsable sa pagbebenta ng ipinagbabawal na gamot sa Binondo at mga kalapit lugar sa Metro Manila.

Nasamsam sa mga ito sa isinagawang buy-bust operation ang may 1,716 gramo ng shabu. (Ulat ni Gemma Amargo)