Mister kinatay ni misis

Isang mister ang pinagsasaksak hanggang sa mapatay ng kanyang misis, kamakalawa ng gabi sa Quezon City.

Namatay habang ginagamot sa East Avenue Medical Center ang mister na nakilalang si Constantino Mayo, 30, ng Tagumpay St., Brgy. Bagong Silangan ng nasabi ring lungsod. Nagtamo ito ng saksak sa likuran at tiyan.

Samantala, kasalukuyan namang nakakulong at isinasailalim sa imbestigasyon ang misis nito na nakilalang si Alma Mayo, 28, tubong Surigao.

Batay sa pagsisiyasat ng pulisya, dakong alas-6 ng gabi nang maganap ang insidente sa loob mismo ng bahay ng mag-asawa.

Una’y narinig ang pagtatalo ng mag-asawa hanggang sa humantong sa pisikal na pag-aaway.

Dahil sa malakas ang biktima, kumuha na lamang ng kutsilyo ang suspect at agad na inundayan ng saksak ang una.

Ayon pa sa misis hindi na rin umano niya kaya ang ginagawang pananakit sa kanya ng kanyang mister bukod pa sa problemang ibinibigay nito sa kanya. (Ulat ni Doris Franche)