Landlord napatay ng boarder

Patay ang isang landlord matapos na pagsasaksakin ito ng kanyang boarder dahil lamang sa dating alitan kahapon ng madaling-araw sa Quezon City.

Tatlong saksak sa katawan ang tumapos sa buhay ni Marcos Ravala, 39, ng #10 Old Cabuyao, Sauyo, Novaliches,Q.C. habang pinaghahanap naman ang suspect na si Julius Benig na mabilis na tumakas matapos ang insidente.

Ayon kay PO2 Mario Turiano ng CPD-CIU, dakong alas-2 ng madaling- araw nang makasalubong ng biktima na galing sa videoke bar ang suspect.

Nagkaroon ng mainitang pagtatalo ang biktima at ang suspect hanggang sa bigla na lamang bumunot ng patalim ang huli at pinagsasaksak ang una.

Lumilitaw na may matagal ng alitan ang dalawa hanggang sa muling mabuksan ang isyu at humantong sa madugong awayan. (Ulat ni Doris Franche)