Sekyu natodas sa sunog

Isang security guard ang natagpuang patay sa loob ng nasusunog na garment factory, kahapon ng madaling-araw sa Mandaluyong City.

Ang biktima na nagtamo ng saksak sa iba’t ibang parte ng katawan at may palatandaang pinalo ng matigas na bagay sa ulo ay nakilalang si Dioly Bandic, nasa hustong gulang at security guard ng isang garment factory na makikita sa 3617 San Rafael St., Brgy. Plainview ng nasabing lungsod.

Sa ulat, natagpuan ang bangkay ng biktima nang rumisponde ang mga bumbero sa nasabing garment factory dakong alas-2:15 ng madaling araw.

Nabatid na nang pasukin ng mga bumbero ang pabrika ay tumambad sa kanilang paningin ang bangkay ng biktima.

May hinala ang pulisya na posibleng tinangkang awatin ng biktima ang hindi pa nakikilalang suspect sa pagsunog nito sa pabrika kung kaya’t napilitan itong patayin ang biktima.

Sa kasalukuyan ay isang masusing imbestigasyon ang isinasagawa ng mga awtoridad hinggil sa nasabing insidente upang alamin ang motibo ng panununog at kung sino ang may kagagawan sa pamamaslang sa nasabing sekyu. (Ulat ni Edwin Balasa)