Tinedyer pinagalitan ng lolo, nagbigti

Isang 18-anyos ang nagpasyang wakasan ang sariling buhay nang magbigti matapos na pagalitan ng kanyang lolo dahil sa pagiging sugapa sa droga at pagiging basagulero, kahapon ng umaga sa Quiapo, Manila.

Nakilala ang biktima na si Aldrin Chavez, binata, ng #14 Praternal St., Quiapo.

Sa ulat ng WPD-Homicide Division, nadiskubre ang pagpapakamatay ni Chavez dakong alas-6 ng umaga sa loob ng kuwarto nito.

Nabatid na bago ang pagbibigti, umuwi ang biktima sa bahay na umano’y nasa impluwensiya ng droga. Sinalubong ito ng kanyang lolo ng sermon dahil sa konsumisyong ipinapasok sa kanilang pamilya.

Nabatid na matapos ang hapunan ay hindi na ito lumabas ng kuwarto ang biktima. Gigisingin sana ito ng kasambahay nang madiskubre ang ginawang pagbibigti gamit ang isang lubid na abaka. Wala namang natagpuang suicide letter buhat sa biktima sa kanyang kuwarto. (Ulat ni Danilo Garcia)