Malabon fire: P10-M ari-arian naabo

Umaabot sa P10 milyong halaga ng mga ari-arian ang naging abo makaraang masunog ang two storey industrial warehouse, kamakalawa ng hapon sa Malabon City.

Batay sa ulat, dakong alas-4 ng hapon nang magsimulang tupukin ng apoy ang Hanson Furniture na matatagpuan sa #1 Victoneta Ave., Brgy. Potrero, ng nabanggit na lungsod.

Ayon kay FO1 Rizaldy Evangelista, radio operator ng Malabon Fire, dakong alas-8:52 ng umaga na kahapon nang tuluyang maapula ang apoy sa nasusunog na warehouse na pag-aari ng Chinese-Filipino trader na si Alex Go-Dulcea.

Base sa imbestigasyon, nagsimula ang apoy sa ground floor ng nasabing warehouse at agad na kumalat ito sa buong gusali.

Lubha namang nahirapan ang mga bumbero sa pag-apula ng apoy dahil sa mga nakatambak na kemikal sa loob ng warehouse bukod pa sa pagiging luma ng gusali nito.

Wala namang iniulat na namatay o nasaktan sa sunog na umabot sa Task Force Charlie. (Ulat ni Rose L. Tamayo)