11 estudyante timbog sa pot session

Labing-isang kabataang estudyante na kinabibilangan ng apat na babae ang dinakip makaraang mahuli sa aktong humihitit ng marijuana sa loob ng kanilang sinasakyang van sa Quezon City, kamakalawa ng gabi.

Ang mga dinakip ay nakilalang sina Rose Manales, 23; Teresa Villanueva, 19; Joyce Castillo, 20; Janice Ramirez, 21; Roy Hobbs Bacani, 19; Francis Manapat, 23; Mark Manales, 24; Vincent Velasquez, 22; Apeli Cesar Talete, 21; Francis Tadeo, 18 at Paul Anthony Domingo, 24 na pawang nakapiit ngayon sa Central Police District-Kamuning Station.

Batay sa ulat ng pulisya, ang mga estudyante ay hinuli dakong alas-8 ng gabi habang ang mga ito ay lulan ng isang Toyota Hi-Ace van na may plakang UPK 265 na nakaparada sa may Jade Valley sa Timog, Quezon nang mamataan ng mga nagpapatrulyang pulis.

Naaktuhan ang mga ito na humihitit ng marijuana sa loob ng sasakyan.

Ayon pa sa mga pulis, naging bastos pa sa pakikipag-usap si Tadeo dahil binubugahan pa umano nito ng usok ng marijuana ang mga arresting officer.

Ang mga nadakip ay sinampahan na ng kasong paglabag sa RA 9165 o Dangerous Drugs at umaabot sa P200,000 ang piyansa ng mga ito para sa kanilang pansamantalang kalayaan. (Ulat ni Doris Franche)