Bebot binurdahan ng bala dahil sa droga

Onsehan sa droga ang nakikitang motibo ng pulisya sa pagkakapatay sa isang babae makaraang makita itong naliligo sa sariling dugo at nakabulagta sa gilid ng kalsada kamakalawa ng gabi sa Pasig City.

Ang biktima na nagtamo ng labing-isang tama ng bala ng baril sa ulo at katawan ay nakilala lamang sa alyas na Jasmin.

Sa ulat ng pulisya, nakarinig ang ilang residente ng M. Soriano St., Barangay Sto. Tomas ng sunud-sunod na putok ng baril dakong alas-10:45 ng gabi.

Ilang sandali pa nakita na ng mga residente sa nasabing lugar ang bangkay ng biktima na naliligo sa sariling dugo na nakabulagta sa gilid ng kalsada.

Sa pagsisiyasat ng pulisya, nakita ang ilang pirasong sachet ng shabu na nakatago sa bra ng biktima.

Kasalukuyan pang iniimbestigahan ng pulisya kung ano ang tunay na motibo sa pagpaslang at kung sino ang maaaring sangkot dito. (Ulat ni Edwin Balasa)