Dentista iniwan ng asawa,nagbigti

Tuluyan nang winakasan ng isang 40-anyos na dentista ang kanyang buhay dahil sa labis na depresyon matapos hiwalayan ng kanyang misis nang magbigti ito, kahapon ng umaga sa Tondo, Maynila.

Nakilala ng pulisya ang nasawi na si Dr. Renato Valenzuela, ng 1333 Masinop St., Tondo, Manila.

Sa ulat ng WPD-Homicide Division, nadiskubre ang pagpapakamatay ng biktima dakong alas-7:15 ng umaga sa loob ng kanyang silid.

Nabatid na kinatok ng kanyang pamangkin na si Emil ang pinto ng kuwarto at ginigising na ito, subalit walang sumagot sa kanyang tawag. Dahil dito, napilitan ang kapatid ng nasawi na si Ramil na puwersahang buksan ang kuwarto at bumulaga nga sa kanila ang nakabiting dentista.

Sa imbestigasyon ng pulisya, labis na depresyon umano ang sanhi ng pagpapatiwakal nito nang makipaghiwalay dito ang kanyang misis at isama pa ang kanilang apat na anak. (Ulat ni Danilo Garcia)