Taas pasahe sa mga bus inihain

Nagsampa kahapon ng petisyon sa Land Transportation Franchising Regulatory Board (LTFRB) ng dagdag pasahe ang mga bus operators na nag-ooperate sa Metro Manila at mga lalawigan sa bansa.

Sa kanilang petisyon, P2.00 dagdag sa minimum na pasahe ang hinihingi ng Integrated Metro Manila Bus Association (IMMBOA) at .37 centavos sa succeeding kilometer, P1.50 fare increase naman ang hinihiling ng Intercity Manila Bus Association at .90 centavos para sa succeeding kilometer.

Samantala, P2.00 din ang giit ng Luzon, Visayas at Mindanao bus operators mula sa Phil. Bus Operators Association of the Philippines (PBOAP) at P1.00 para sa succeeding kilometer.

Habang P1.50 rin ang isinampang petisyon sa taas pasahe sa bus operators mula sa Bulacan Association Transport Organization at P1.00 para sa succeeding kilometer.

Sa kanilang petisyon dinahilan ng transport group ang pagtaas presyo ng krudo; pagbagsak ng piso kontra dolyar; pagtaas ng presyo ng mga spare parts at maintenance fee.

Una rito, binuhay ng PISTON at ACTO ang P1.00 dagdag sa pasahe naman sa jeep dahil na rin sa mga nabanggit ding problema. (Ulat ni Angie dela Cruz)