Kuya tinarakan ng utol na bebot, kritikal

Isang lalaki ang sinaksak ng nakababata nitong kapatid na babae makaraang gulpihin ng una ang huli matapos na magtalo dahil sa problema sa pamilya, kamakalawa ng gabi sa Makati City.

Ginagamot ngayon sa Ospital ng Makati ang biktimang nakilalang si Antonio Alarcon, 47, ng 8559 San Jose St., Barangay Guadalupe Nuevo ng lungsod na ito. Nagtamo ito ng saksak sa katawan buhat sa isang kutsilyo.

Sumuko naman sa pulisya ang suspect na nakilalang si Victoria Alarcon-Lozano, 43, biyuda ng nabanggit na lugar.

Sa imbestigasyon ni PO3 Rio Bucalan ng Makati City police naganap ang insidente dakong alas-7:50 ng gabi sa loob ng bahay ng magkapatid sa San Jose St. sa Brgy. Guadalupe.

Binanggit pa sa ulat na nagkaroon ng pagtatalo ang magkapatid hinggil sa problema sa kanilang pamilya. Nagkasagutan umano ang dalawa hanggang tuluyang saktan ni Antonio ang kapatid na babae na nagdilim naman ang paningin at mabilis na kumuha ng kutsilyo at saka sinaksak sa kuya.

Matapos ang ginawang pananaksak agad namang sumuko sa pulisya ang suspect. (Ulat ni Lordeth Bonilla)