2 killer arestado

Dalawang kilabot na killer na sangkot sa pagpaslang sa isang pusher, isang pulis at isang pedicab driver ang nasakote ng mga elemento ng Western Police District (WPD) sa isang operasyon, kahapon ng umaga sa lungsod ng Maynila.

Nakilala ang mga nadakip na sina Serafin Catindoy, 29, miyembro ng Bahala Na Gang at si Wilfredo Valera, 29, miyembro naman ng Sigue-Sigue Sputnik.

Ayon sa ulat, nadakip ang mga suspect dakong alas-2:30 ng madaling-araw sa may panulukan ng Arellano at Zobel Sts. sa Malate, Maynila.

Napag-alaman na responsable si Valera sa pagpaslang sa kasamahan nilang drug pusher na si Teresita Silverio, 40, na natagpuang tadtad ng saksak sa loob ng kanyang bahay sa P. Ocampo St. Malate noong Nobyembre 27.

Nabatid na unang naaresto si Silverio at ikinanta nito sina Valera at isang alyas Ambo na pinagkukunan niya ng droga.

Naaresto naman ang mga suspect at nang makalabas ng kulungan ay binalikan si Silverio at pinatay.

Umamin naman ang nadakip na si Catindoy sa pagpaslang sa isang pulis-Pasay at sa isang pedicab driver. (Ulat ni Danilo Garcia)