Yaya kumidnap sa alaga,arestado

Kalaboso ang kinahantungan ng isang 22-anyos na katulong nang maaresto ito ng pulisya matapos itakas ang mahigit na isang buwang sanggol na kanyang alaga sa Pasig City.

Ang suspect ay nakilalang si Jackie Lou Amante, tubong Hagonoy, Bulacan, at isang buwan pa lang na nanunungkulan bilang kasambahay sa bahay ng mag-asawang Sandigar.

Batay sa ulat, naganap ang pagdukot dakong ala-1 ng hapon sa bahay ng mag-asawang Sandigar sa Blk. 1, Lot 22 Tulip St., Garden Royale Villas, Brgy. Pinagbuhatan, ng lungsod na ito.

Nabatid na nasa bakasyon ang magulang ng sanggol nang itakas ng suspect ang biktima.

Sa isinagawang follow-up operation ng pulisya, nasakote ang suspect sa terminal ng Baliuag Transit sa Cubao, QC habang papasakay ng bus papauwi sa kanilang lalawigan.

Sinabi naman ng suspect na wala itong balak kidnapin ang kanyang alaga, gusto lang umano nitong ipasyal ang biktima sa kanilang lalawigan para makasagap ng sariwang hangin, inamin din nitong nagkamali siya ng hindi ipaalam ang bata sa kanyang mga magulang na kasalukuyang nagbabakasyon ng mga araw na iyon.

Nakapiit ngayon sa Pasig detention cell ang suspect habang inihahanda ang kasong kidnapping laban dito. (Ulat ni Edwin Balasa)