Nasawi habang isinusugod sa Tondo Medical Center ang biktimang si Ramil Gonzales, 49, ng Looban 3, Sulucan Hulong Duhat matapos na magtamo ng bala ng kalibre .22 sa likod.
Kasalukuyan namang sumasailalim sa interogasyon ng pulisya ang kapatid nitong si Siquel Gonzales, 55 dahil ito lamang ang kasama ng biktima sa pina-uupahang commercial space sa 24 F.Sevilla Blvd. bago maganap ang insidente bandang ala-1 kamakalawa ng hapon.
Lumilitaw na may malaking galit at inggit umano si Siquel sa biktima dahil dito lamang ipinagkatiwala ng kanilang magulang ang naiwang negosyo kabilang ang paupahang lugar.
Bunga nito, malaki ang paniniwala ng pulisya na posibleng inggit ang nag-udyok sa suspect upang isagawa ang krimen.
Gayunman, iniimbestigahan pa ng pulisya ang posibleng ibang motibo ng pamamaslang. (Ulat ni Jo Cagande)