Halos tuyo na ang dugo sa bangkay ng biktimang si Michael de Villa,17, 1st Yr. Engineering student sa Mapua Institute of Technology at nakatira sa 528 M. dela Fuente St. Sampaloc, Maynila at tubong Tanauan, Batangas nang matagpuan ng nagpapatrulyang guwardiya ng SM Manila. Nakilala ang biktima sa pamamagitan ng kanyang identification card at sinasabing kamag-anak umano ni dating Defense Secretary Renato de Villa.
Sa ulat ni SPO2 Alfredo Salazar ng WPD-Homicide Division, natagpuan ang bangkay ng biktima dakong alas-11 ng gabi sa YMCA compound sa tabi mismo ng SM Manila sa Arroceros St. ng nasabi ding lungsod.
Wala pang malinaw na teorya ang pulisya kung nagsuicide ang biktima o itinulak ito mula sa ikalimang palapag ng naturang establisiyimento. (Ulat ni Danilo Garcia)