Dinukot na trader pinalaya ng kidnappers

Pinalaya na ng kanyang mga kidnaper ang 45-anyos na Filipino-Chinese trader kamakalawa ng gabi matapos umanong magbayad ito ng sampung milyong piso sa mga suspect na pinaghihinalaang mga miyembro ng kidnap-for-ransom syndicate.

Base sa impormasyon, si William Uy, may-ari ng Kaunlaran Construction Supply sa Lapu-Lapu St., Brgy. Longos, Malabon City, kung saan dito rin siya dinukot ng walong armadong kalalakihan noong nakaraang linggo ay napag-alamang inabandona ng kanyang mga kidnaper sa Parañaque City matapos magbigay ng naturang halaga sa mga suspect ang kanyang pamilya.

Nabatid pa na nasa maayos na kalagayan si Uy nang pakawalan ito ng mga suspect.

Sa panayam naman ng PSN kay Malabon City Police Chief Supt. Pedro Ramos, kinukuha na rin umano mula sa kanilang pag-iingat ng pamilya ni Uy ang sasakyan nitong puting Nissan Frontier, may plakang YWU-888 na ginamit ng mga suspect bilang get-away car sa pagkidnap sa kanya.

Magugunita na narekober ng pulisya ang nasabing sasakyan sa Brgy. Madaran, GMA, Cavite, tatlong araw matapos kidnapin si Uy. (Ulat ni Rose Tamayo)