US visa consultant tiklo sa kotong

Inaresto ang isang US Visa Consultant matapos itong ireklamo ng isang babae na kanyang pinangakuan na ikukuha ng US visa kapalit ng P260,000 bayad sa isinagawang entrapment operation, kahapon sa Caloocan City.

Nakakulong at nahaharap sa kasong estafa ang suspect na si Ranel Tiglao, ng 4239 Diam St., Karuhatan, Valenzuela.

Sa ulat ng pulisya, dakong ala-1:20 ng hapon nang arestuhin ang suspect sa loob ng isang restaurant sa ground floor ng Gotesco Grand Central na nasa J.P Rizal Ext., Caloocan City.

Nabatid na bago ang pag-aresto, noong nakalipas na Mayo 27 at Hunyo 9 ay nagpunta ang suspect sa bahay ng isang nagngangalang Eloisa Capati ng Josefina St., ng nabanggit na lungsod at pinangakuan ang huli na bibigyan ng US visa kapalit ng nasabing hinihinging halaga.

Dahilan sa kagustuhan na makakuha ng visa ay agad namang nagtiwala si Capati sa suspect kung saan nagbigay umano ito ng paunang bayad sa suspect.

Ilang araw pa ang lumipas ay muli umanong nanghingi ng pera ang suspect subalit nagduda na si Capati kung kaya humingi na ito ng tulong sa Caloocan police na agad namang nagsagawa ng entrapment operation laban sa suspect. (Ulat ni Rose Tamayo)