Nakakulong at nahaharap sa kasong child abuse ang suspect na nakilalang si Rigoberto Melo Manalang, walang trabaho ng Mocking Bird St., Brgy. Rizal ng naturang lungsod.
Nailigtas naman sa tiyak na kapahamakan ang hinostage na mga paslit na sina Irish Kate, 4; Dianne Erika, 5; at Rigo, 6.
Base sa ulat ng pulisya, naganap ang pangho-hostage dakong alas-7 ng umaga nang biglang magwala sa loob ng sarili nilang bahay ang suspect na noon ay nasa impluwensiya ng droga.
Armado ng dalawang kutsilyo, bigla nitong hinablot ang mga anak at saka hinostage. Binanggit nitong may humahabol at gustong pumatay sa kanya at ang tatlong bata ang ginagawa umano nitong panangga.
Palit-palit nitong tinututukan ng patalim ang kanyang tatlong anak.
Dahil dito, napilitan na ang asawa ng suspect na nakilalang si Maria Angeliza, 27, na humingi ng tulong sa pulisya.
Subalit bago pa man dumating ang mga pulis ay nasugatan na ng suspect ang isa sa kanyang mga anak na si Irish.
Samantala, nakakita ng pagkakataon si Maria Angeliza nang bitawan ng kanyang mister ang kanilang mga anak.
Mabilis nitong tinangkang agawin ang hawak na patalim at dahil dito agad na ring kumilos ang mga pulis at nasagip ang misis at ang tatlo nitong anak.
Nagtamo rin ng sugat sa kamay si Maria Angeliza bunga ng pag-agaw nito ng patalim sa kanyang mister.
Agad na nadakip ang suspect na ngayon ay nasa himpilan ng pulisya. Inihahanda na ang kaukulang kaso laban dito.(Ulat ni Lordeth Bonilla)