Martial arts instructor niratrat, patay

Isang martial arts instructor ng RP team na kaanak ni Muntinlupa Mayor Jaime Fresnedi ang nasawi, samantalang ang kasama nitong isa ring martial arts expert ay nasa kritikal pang kondisyon makaraang pagbabarilin ng hinihinalang isang estudyante ng una dahil sa matagal nang alitan kahapon ng madaling araw sa harap ng isang bar sa Makati City.

Sa inisyal na ulat na nakarating sa tanggapan ni Supt. Jose Ramon Salido, hepe ng CID ng Makati City Police nakilala ang nasawing biktima na si Emiliano Familiar, 28, ng Muntinlupa City. Patay na ito nang idating sa Makati Medical Center sanhi ng tinamong ilang tama ng bala ng baril sa iba’t ibang bahagi ng katawan.

Samantala nasa malubhang kalagayan naman ngayon ang isa pang biktima na si Arturo Alvin Aguilar na sinasabing pamangkin naman nina Las Piñas Congresswoman Cynthia Villar at Las Piñas Mayor Vergel "Nene" Aguilar.

Pansamantalang hindi muna binanggit ang pangalan ng suspect na hinihinalang isa sa estudyante ni Familiar na mabilis na tumakas matapos ang isinagawang pamamaril.

Ayon sa inisyal na ulat, naganap ang insidente dakong alas-3:15 ng madaling-araw sa harapan ng Olive Bar sa Makati Avenue, Makati City.

Nakatayo ang mga biktima sa harap ng bar nang biglang sumulpot ang isang kulay pulang Honda CRV na may plakang WPD-506 na doon sakay ang suspect at walang sabi-sabing pinagbabaril ang mga biktima.

Lumalabas sa inisyal na imbestigasyon na dating alitan sa larong basketball ang motibo sa isinagawang pagpaslang sa biktima. Samantala patuloy pa rin ang isinasagawang imbestigasyon sa naturang kaso. (Ulat ni Lordeth Bonilla)