Sekyu sa NAIA nagbalik ng pera

Pinatunayan ng isang guwardiya na nakatalaga sa Ninoy Aquino International Airport (NAIA) ang kanyang katapatan sa pagtupad ng tungkulin nang ibalik nito ang napulot na envelope na naglalaman ng halagang 8,000 Singaporean dollars o P300,000.

Sa ulat na tinanggap ni NAIA general manager Edgardo Manda ang matapat na guwardiya ay nakilalang si Jerry Dalit, 36, tubong Pola, Oriental Mindoro at residente ng Marigold St., Rivera Village, Pasay City.

Matinding kasiyahan naman ang nadama ng may-ari ng salapi na nakilalang si Leonor Kloo, negosyante ng San Juanico St., Ayala, Alabang Village, Muntinlupa nang maibalik sa kanya ang nawawalang pera.

Batay sa imbestigasyon, dakong ala-1:35 ng hapon habang nasa kasagsagan ang buhos ng ulan nang matagpuan ni Dalit ang brown envelope na naglalaman ng salapi sa NAIA 1 departure parking area.

Ayon kay Dalit, hindi kaya ng konsensiya nito na angkinin ang salapi na hindi naman niya pinaghirapan at ayaw din niyang dungisan ang kanyang pangalan sa loob ng tatlong taon niyang pagsisilbi bilang security guard sa NAIA. (Ulat ni Butch Quejada)