Nabukong nagnakaw ng brief, pumatay

Nasawi ang isang lalaki nang pagsasaksakin ito ng kanyang kainuman matapos ang isang pagtatalo makaraang akusahan ng una ang huli na nagnakaw ng kanyang brief, kamakalawa ng gabi sa Caloocan City.

Hindi na umabot pang buhay makaraang isugod sa Nodados General Hospital sanhi ng tinamong dalawang saksak sa dibdib ang biktimang si Noel Dalanguit, 21, ng Block 3, Tierra Nova Royal Subdivision, Barangay Bagumbong ng nabanggit na lungsod.

Kasalukuyan namang pinaghahanap ang suspect na si Rodel Galero, 21, kapitbahay ng biktima.

Sa nakalap na impormasyon, dakong alas-8 ng gabi nang maganap ang insidente sa tapat ng bahay ng suspect.

Napag-alaman na nag-iinuman ang dalawa nang mapansin ng biktima ang nakasampay na brief sa sampayan ng suspect. Ito umano ang nawawalang brief ng biktima at katunayan ay nakaburda pa rito ang inisyal ng nasawi na N.D.

Dahil dito, sinabihan ng biktima na magnanakaw ng brief ang suspect hanggang sa magkaroon sila ng mainitang pagtatalo na humantong upang kumuha ng kutsilyo ang huli at undayan ng saksak ang una.

Mabilis na tumakas ang suspect matapos ang isinagawang krimen. (Ulat ni Rose Tamayo)