Paslit, 1 pa patay sa sagasa

Isang magkapitbahay, kabilang ang isang 9-anyos na batang babae ang nasawi matapos na kapwa masagasaan ng isang rumaragasang sasakyan habang tumatawid sa Taguig kamakalawa.

Kapwa dead-on-the-spot ang magkapitbahay na biktima na nakilalang sina Shelalane Gordones, at isang nagngangalang Clarissa, 41, parehong naninirahan sa Blk. 9, Lot 2, ISG Central, Brgy. Western Bicutan.

Samantala, nadakip ang driver ng sasakyan na si Filmore Cahilog, 30, ng Brgy. San Benito, Victoria, Laguna.

Nabatid na naganap ang insidente dakong alas-5 ng hapon sa kahabaan ng South-bound ng C-5 Road, Brgy. Western Bicutan, Taguig.

Kagagaling lamang sa probinsiya ni Gordones at nag-aalala si Clarissa na baka mawala ang naturang bata kaya’t hinabol niya ito.

Hindi akalain ng dalawa na paparating ang isang rumaragasang Isuzu Dropside na may plakang WNV-501.

Huli na bago makontrol ng driver ang preno nito hanggang sa mahagip ang mga nabanggit na biktima. (Ulat ni Lordeth Bonilla)