Amain nanermon, tinarakan ng anak-anakan

Dinakip ng mga tauhan ng pulisya ang isang 22-anyos na lalaki makaraang saksakin nito ang kanyang amain na nanermon sa kanya kaugnay sa bisyo nitong droga, kamakalawa ng gabi sa Makati City.

Nasa malubhang kalagayan sa PGH ang biktima na nakilalang si Rodolfo Chico, 52, sanhi ng tinamong saksak sa katawan at hita.

Nakilala naman ang nadakip na suspect na si Jocques Carlo Sagarol.

Base sa ulat, naganap ang insidente dakong alas-9:45 ng gabi sa bahay ng dalawa sa Brgy. Kasilawan sa nabanggit na lungsod.

Napag-alaman na sinermunan ng biktima ang anak-anakan tungkol sa bisyo nitong pagsa-shabu na ikinagalit naman ng huli.

Minasama ng suspect ang sermon sa kanya kaya mabilis itong naglabas ng patalim at sinaksak ang amain. (Ulat ni Lordeth Bonilla)