Plantang nag-chemical attack sa Pasig City, ipinasara

Ipinag-utos kahapon ni Pasig City Mayor Soledad Eusebio ang pansamantalang pagpapasara ng planta ng kemikal na pag-aari ng bayaw ni MMDA chairman Bayani Fernando matapos na maperwisyo ang may 300 residente na isinugod sa mga pagamutan makaraang sumingaw ang nakalalasong amoy ng kemikal, noong Linggo.

Kasabay nito, binigyan ng 24 oras na taning ni Eusebio ang mga opisyal ng R.I Chemical Industry na matatagpuan sa Bagong Ilog ng nabanggit na lungsod para linisin ang nakakalasong amoy ng kemikal sa nasabing lugar.

Inatasan din ng pamahalaang lungsod ang mga opisyal sa planta na pag-aari ng isang tinukoy sa pangalang Mr. Carlos na maglagay ng safety measures at anti-pollution devices upang maiwasang maulit pa ang pagtagas ng nakalalasong kemikal.

Sinabi ni Eusebio na hindi pahihintulutan na muling mag-operate ang planta hangga’t hindi nabibigyan ng kompensasyon ang may 300 residente na naapektuhan sa insidente. (Ulat ni Joy Cantos)