Babaeng drug pusher hinatulan ng habambuhay

Habambuhay na pagkabilanggo ang inihatol kahapon ng Pasay City Regional Trial Court (RTC) sa isang Fil-Chinese national na umano’y miyembro ng international drug ring matapos itong masamsaman ng may 247 kilos ng shabu noong nakalipas na Disyembre 26, 2000 sa nabanggit na lungsod.

Bukod sa habambuhay na pagkabilanggo, iniutos din ni Pasay City RTC Judge Cesar Ylagan ng Branch 231 sa akusadong si Sandra Lim, 31, ng Somerset Condominium Unit Room 706 ang pagbabayad ng isang milyong pisong penalty.

Base sa rekord ng korte, ni-raid ng mga ahente ng National Bureau of Investigation (NBI) ang unit ni Lim na doon natagpuan ang 247 kilo ng shabu.

Hindi inabutan ng operatiba si Lim sa isinagawang raid. Abril 7, 2001 ng masakote si Lim sa Pasay City din. (Ulat ni Lordeth Bonilla)