Karibal kinatay ni mister

Dahil sa matinding selos, pinatay sa saksak ng isang mister ang umano’y kanyang karibal sa pag-ibig at pagkatapos ay sinaksak din nito ang sariling misis matapos na mahuli ang dalawa na magkasama, kamakalawa ng gabi sa Parañaque City.

Nasawi noon din ang biktima na nakilalang si Euprisk de Jesus, alias Doods, binata, makaraang matadtad ng saksak sa iba’t ibang bahagi ng katawan.

Ginagamot naman sa South Super Highway Medical Center si Yolanda Almedilla, 37, ng Barangay Marcelo Green, Parañaque City na tinarakan din ng malalim na saksak sa kaliwang balikat ng kanyang mister.

Kasalukuyan namang nakapiit ang suspect na si Porferio Almedilla, 41, ng nabanggit na lugar matapos ang isinagawang krimen.

Ayon sa imbestigasyon ni SPO2 Alberto Parena, may hawak ng kaso na naganap ang insidente dakong alas-8 ng gabi kamakalawa sa bahay ng mga Almedilla.

Napag-alaman na matagal nang pinagseselosan ng suspect ang nasawing si de Jesus na inakala niyang ka-relasyon ng kanyang misis.

Kamakalawa ay nadatnan ng suspect sa kanilang bahay ang biktima kasama ang kanyang misis at agad itong nagduda na may ginagawang masama ang mga ito. Nagdilim umano ang paningin ng suspect kaya’t mabilis itong kumuha ng kutsilyo at sinugod ng saksak ang biktima na agad na binawian nang buhay, pagkatapos ay hindi rin nito napigilan ang sarili na saksakin din ang kanyang misis. (Ulat ni Lordeth Bonilla)