4 Chinese drug traffickers, arestado

Naaresto ng mga tauhan ng Central Police District ang apat na Chinese na pinaniniwalaang mga big-time drug dealer sa isinagawang buy-bust operation sa Quezon City, kamakailan.

Nakilala ang mga dinakip na sina Dy Chin Hu, 49; Yu Go Bun, 47; Dexter Tan, 50 at Choi Wei Nen, 50.

Batay sa ulat, nadakip ang mga suspect matapos ang isinagawang buy-bust operation sa parking lot ng SM North sa EDSA, Quezon City.

Nasamsam sa mga ito ang may 500 gramo ng shabu na nagkakahalaga ng isang milyong piso.

Bukod dito, nasamsam din sa mga nabanggit ang isang Mitsubishi L-300 van na pinaniniwalaang ginagamit sa kanilang ilegal na gawain.

Ayon sa ulat, matagal na umanong minamanmanan ng mga awtoridad ang kilos ng mga suspect hanggang sa makumpirma nila ang impormasyon na sangkot ang mga ito sa bentahan ng droga.

Dahil dito, isang operasyon ang inihanda ng mga awtoridad na dito nahulog sa bitag ang mga suspect. (Ulat ni Doris Franche)