10 counts ng rape sa CAT instructor

Nahaharap ngayon sa kasong 10 counts ng rape sa Quezon City Prosecutor’s Office ang isang instructor ng Citizens Army Training (CAT) makaraang paulit-ulit nitong gahasain ang isang estudyante.

Ang suspect na si Archilles Mariano, alyas Mike, 22, may-asawa, CAT instructor sa Ernesto Rondon High School ay ipinagharap ng reklamo ng biktima na itinago sa pangalang Olive, 16.

Ayon sa sumbong ng biktima matagal na umano siyang pinagsasamantalahan ng suspect sa magkakahiwalay na insidente sa loob ng inuupahan nitong bahay sa Pag-asa, Quezon City.

Tinatakot pa umano siya nito na ibabagsak sa klase kung hindi papayag sa kanyang pagnanasa.

Dahil na rin sa hirap ng loob na dinaranas, ipinasya ng biktima na magsumbong sa kanyang ina matapos ang huling panggagahasa, kamakalawa ng gabi.

Agad namang nagsumbong sa pulisya ang mag-ina kasunod ang isinagawang pagdakip sa suspect. (Ulat ni Doris Franche)