2 lalaki dinampot sa hazing

Arestado ang dalawang lalaki makaraang ireklamo ito ng isang dalagita na kanilang isinailalim sa initiation rites kamakalawa sa Quezon City.

Nakapiit ngayon sa Talipapa Police Station ang mga suspect na nakilalang sina Joel Latera, 25, at Leandro Bual, 17, estudyante.

Ayon sa pahayag ni Shiela Marie Gonzales, 13, 1st year student sa North Fairview High School na naganap ang insidente dakong alas-3 ng hapon.

Nauna rito, hinikayat ng mga suspect ang biktima na sumama umano sa isang samahan ng mga mag-aaral.

Walang kamalay-malay ang biktima na sa grupong AKRHO fraternity siya dadalhin ng mga suspect.

Laking gulat na lamang ng biktima nang piringan siya ng mga suspect at saka pinagpapalo ng kahoy sa puwit.

Dahil sa naranasang matinding sakit, mabilis na tumakas ang biktima at nagsumbong sa kanyang mga magulang.

Agad namang nagresponde ang mga tauhan ng pulisya makaraang magreklamo ang mga magulang ng biktima at nadakip ang dalawang suspect. (Ulat ni Doris Franche)