Pabahay pa sa mga pulis, sundalo

Ipatutupad na ng Air Materielle Wing Savings Loan Association Incorporated (AMWSLAI) ang pagbibigay ng murang pabahay para sa mga miyembro ng Philippine Air Force at Philippine National Police.

Ito’y makaraang lagdaan ng AMWSLAI at 8 Dragons Realty Development ang Memorandum of Agreement (MOA) sa isinagawang press conference sa Libis, Quezon City.

Ayon kay Capt. Richard Maron Spokesperson ng AMWSLAI, ang 500 paunang unit ng pabahay ay itatayo sa Sapang Maysa, Mexico, Pampanga at may hulog na P4,500 kada buwan na babayaran sa loob ng 15 taon.

Sinabi naman ni Nestor Uy, Pangulo ng 8 Dragons Realty, umaabot na sa 200,000 ang miyembro ng AMWSLAI mula sa PNP, Army, Navy, Marines at maging ang mga bumbero.

Tiniyak ng 8 Dragons Realty na madali para sa mga nais na mag-avail ang halaga ng kanilang pabahay at hindi tulad ng ibang housing projects. (Ulat ni Doris Franche)