Ginang hindi nagpautang binoga

Dahil sa hindi pagpapautang, nakuhang pagbabarilin hanggang sa mapatay ng isang lalaki ang isang ginang, kamakalawa sa Tala, Caloocan City.

Nakilala ang nasawing ginang na si Milagros Lua, 42, ng Brgy. Sta. Rita, Tala. Ang biktima ay hindi na umabot pang buhay makaraang isugod sa Dr. Rodriguez Memorial Hospital sanhi ng tinamong anim na tama ng bala ng baril sa katawan.

Nabatid sa imbestigasyon ng pulisya, nagtungo ang suspect na nakilalang si Jalandoni Sultan sa bahay ng biktima upang mangutang na tinanggihan naman ng huli.

Nagalit umano ang suspect hanggang sa magkaroon ng pagtatalo sa magkabilang panig.

Ilang sandali pa ay narinig na ang sunud-sunod na putok ng baril hanggang sa makita ng mga testigo ang biktima na duguang nakahandusay.

Patuloy na pinaghahanap ang suspect. (Ulat ni Grace dela Cruz)