Bangkay ng rape victim natagpuan

Hinihinalang ginahasa muna bago pinatay ang isang dalagita ng hindi pa nakikilalang salarin makaraang matagpuan ang halos naaagnas na bangkay nito na panty at bra lamang ang saplot sa katawan, kahapon ng umaga sa Pasay City.

Inaalam pa ang pangalan ng biktima na tinatayang nasa edad na 15 hanggang 18-anyos, may taas na limang talampakan at ang buhok ay hanggang balikat.

Ayon sa imbestigasyon ni PO3 Reynaldo Aguba, Pasay City police CID, dakong alas-8:25 ng umaga nang matagpuan ang bangkay ng biktima sa may damuhan sa likod ng GSIS Building sa Libertad Pumping Station sa Macapagal Avenue malapit sa Roxas Boulevard ng nabanggit na lungsod.

Malaki ang paniwala ng pulisya na ginahasa muna ang biktima bago inihampas ang ulo nito sa matigas na bagay na naging dahilan ng kanyang kamatayan.

Natagpuan pa sa tabi ng bangkay nito ang isang brief ng lalaki at t-shirt.

Patuloy pa rin ang isinasagawang imbestigasyon sa kaso. (Ulat ni Lordeth Bonilla)