Dalaga hinoldap muna bago ginahasa

Isang dalaga ang hinoldap muna bago ginahasa ng hindi pa nakikilalang salarin kamakalawa ng gabi sa boundary ng Mandaluyong at Makati City.

Sa ulat na nakarating sa tanggapan ni Supt. Jose Ramon Salido, hepe ng Station Investigation Division ng Makati City Police ang biktima ay itinago sa pangalang Lilet, 21, ng Del Remedio, San Pablo, Laguna.

Ayon sa isinagawang imbestigasyon ng pulisya, naganap ang insidente dakong alas-10 ng gabi sa may Guadalupe Bridge.

Nabatid na habang naglalakad ang biktima sa nabanggit na lugar ay bigla na lamang itong tinutukan ng suspect na nagdeklara ng holdap.

Kinaladkad umano ang biktima sa madilim na lugar malapit sa Mandaluyong at doon isinagawa ang panggagahasa.

Matapos makuha ang gusto ay inuntog pa ang ulo nito sa semento.

Matapos ang insidente ay kaagad na nagtungo ang biktima sa pulisya at isinalaysay ang kanyang sinapit sa kamay ng suspect. (Ulat ni Lordeth Bonilla)