3 pulis na natimbog sa hulidap, kinasuhan na

Pormal nang sinampahan kahapon ng kasong kidnapping at robbery extortion sa piskalya ang tatlong kagawad ng PNP na sangkot sa pang-huhulidap sa isang negosyante sa Quiapo, Manila, noong nakalipas na Martes.

Sina PO3 Robinson delos Reyes, ng PNP Custodial Investigation, PO2 Lutgardo Ramirez, ng CIDG at PO2 Leonardo Lopez, ng WPD-Station 8 ay kasalukuyang nakapiit ngayon sa WPD Integrated Jail.

Pinaghahanap pa rin ang confidential agent ng CIDG na nakilalang si Teofimo Castro matapos nitong matakasan ang mga kagawad ng WPD-Station 8 nang magpaalam itong iihi lamang subalit hindi na bumalik pa.

Magugunitang ang mga suspect ay sangkot sa pagdukot sa biktimang si Quimal Pukunum sa Quiapo, Manila noong nakalipas na Disyembre 31, 2002 dakong alas-6:15 ng umaga habang namimili ang huli sa naturang lugar.

Pinaratangan ng mga suspect ang biktima na isang drug pusher kaya inaresto nila ito.

Mabilis na isinakay ng mga pulis sa kotse ang biktima at doon piniringan ito sa mata at saka kinulimbat ang P800,000 cash, alahas at cellphone nito.

Dinala pa ng mga suspect sa Makati City ang biktima, subalit pagdating sa JP Rizal St. ay na-check point ang kanilang sasakyan dahilan upang magkaroon ng pagkakataon si Pukunum na makahingi ng tulong sa mga awtoridad kaya naaresto ang mga suspect. (Ulat ni Gemma Amargo)