2 pulis na sangkot sa pamamaril, sinibak

Tuluyan nang sinibak sa serbisyo ni PNP chief Director General Hermogenes Ebdane ang dalawang tauhan ng Special Action Force (SAF) na walang pakundangang nagpaputok ng baril na ikinasugat ng apat na katao, kabilang ang tatlong paslit noong Miyerkules ng gabi sa Makati City.

Bukod sa dismissal, ipinag-utos din ni Ebdane ang pagsasampa ng kasong administratibo at kriminal laban kina PO1 Raymond Maghinay at PO1 Richard Bohol.

Naiulat na walang habas na nagpaputok ng baril ang dalawang pulis sa grupo ng mga biktimang sina Calvin Teves, Bryan Rontal, Nemo Flores at Isaish del Mundo na noon ay nagpapaputok ng rebentador.

Nabatid na naka-duty ang dalawang pulis nang mag-inuman ang mga ito at nabulahaw umano sa ginawang pagpapaputok ng mga paslit.

Kaugnay nito, nanawagan naman si Ebdane sa 30 milyong texters na iulat sa PNP Txt2920 ang mga pulis na makikita nilang nag-iinuman o lasing habang naka-duty upang agad nilang maaksiyunan maging ang mga makikitang magpapaputok ng baril ngayong darating na Bagong Taon. (Ulat ni Danilo Garcia)